مردان میں خودکش حملے میں 12 ہلاک، پشاور میں حملے کی کوشش ناکام

پاکستان کے صوبہ خیبر پختونخوا کے شہر مردان میں ہونے والے خودکش حملے میں 12 افراد ہلاک ہوگئے ہیں جبکہ دارالحکومت پشاور میں سکیورٹی فورسز سے مقابلے میں چار خودکش حملہ آور بھی مارے گئے ہیں۔

مردان پولیس کے مطابق یہ خودکش دھماکہ ضلع کچہری کے احاطے میں ہوا اور مرنے والوں میں وکلا اور پولیس اہلکار بھی شامل ہیں۔

مردان میں سرکاری ریسکیو ادارے 1122 کے ترجمان بلال احمد فیضی کے مطابق دھماکے میں ہلاکتوں کی تعداد 12 ہو گئی ہے جبکہ 54 زخمی ہیں۔

مردان کے ضلعی پولیس افسر فیصل شہزاد نے نامہ نگار عزیز اللہ خان کو بتایا کہ ’حملہ آور نے پہلے ضلع کچہری کے داخلی دروازے پر دستی بم پھینکا، جس سے پولیس اہلکار زخمی ہو گئے۔‘

ان کے مطابق پولیس اہلکاروں کی فائرنگ پر حملہ آور کچہری کے اندر کی جانب بھاگا اور خود کو دھماکے سے اڑا لیا۔

دھماکے کے بعد سکیورٹی فورسز کے اہلکاروں نے علاقے کو گھیرے میں لے لیا اور ججوں اور وکلا سمیت دیگر افراد کو محفوظ مقامات پر منتقل کیا۔

خیال رہے کہ پاکستان میں گذشتہ کچھ عرصے سے وکلا کو شدت پسندی کے واقعات میں ہدف بنانے کا رجحان سامنے آیا ہے اور گذشتہ ماہ ہی میں کوئٹہ میں ہسپتال کے باہر ہونے والے دھماکے میں 55 سے زائد وکلا ہلاک ہوگئے تھے۔

اس سے قبل جمعے کی صبح صوبائی دارالحکومت پشاور کی ورسک روڈ پر واقع کرسچیئن کالونی پر شدت پسندوں کے حملے کے بعد جوابی کارروائی میں چار شدت پسند ہلاک ہوگئے۔

پاکستان فوج کے شعبۂ تعلقات عامہ کے ترجمان لیفٹیننٹ جنرل عاصم سلیم باجوہ نے ایک ٹویٹ میں بتایا ہے کہ کرسچیئن کالونی پر حملے کے بعد سکیورٹی فورسز نے بروقت کارروائی کی اور ’چاروں خودکش حملہ آور مارے گئے ہیں، علاقے میں تلاشی کا عمل جاری ہے۔‘

آئی ایس پی آر نے بتایا ہے کہ حملہ آور صبح کے وقت اسلحے اور گولہ بارود کے ہمراہ کالونی میں داخل ہوئے اور پہلے سکیورٹی گارڈ کو نشانہ بنایا۔

حملے کے فوراً بعد سکیورٹی فورسز نے علاقے کو گھیرے میں لے لیا اور فائرنگ کے تبادلے میں حملہ آوروں کو ہلاک کر دیا گیا جبکہ فائرنگ کے تبادلے میں ایف سی کے دو، پولیس کا ایک اہلکار اور دو سویلین سکیورٹی گارڈ زخمی ہوئے۔

سوات سکاؤٹس کے کمانڈنٹ کرنل نعیم نے واقعے کے بعد میڈیا کو بریفنگ دیتے ہوئے کہا کہ ’کرسچیئن کالونی پر حملہ کرنے والے چاروں شدت پسندوں کو سکیورٹی فورسز کی بروقت کارروائی کی وجہ سے کالونی میں واقع گھروں تک پہنچنے نہیں دیاگیا۔ جب شدت پسند ایک جگہ پھنس گئے تو فورسز کا گھیرا تنگ ہوتے دیکھ کر انھوں نے خود کو دھماکے سے اڑا لیا۔‘

بم ڈسپوزل سکواڈ کے حکام کے مطابق ہر حملہ آور کے پاس دو دستی بم اور خود کش جیکٹس تھیں اور جیکٹ میں لگ بھگ چھ کلو گرام تک بارودی مواد تھا ۔

خیال رہے کہ پشاور میں شدت پسند پہلے متعدد بار عام شہریوں اور سکیورٹی اہلکاروں کو نشانہ بنا چکے ہیں۔

تبصرے

comments

اپنا تبصرہ بھیجیں