لاہور: غیر قانونی تجاوزات کے خلاف کارروائی کے دوران دھماکہ، 26 افراد ہلاک 50 سے زیادہ زخمی

پاکستان کے صوبہ پنجاب کے شہر لاہور میں حکام کا کہنا ہے کہ غیر قانونی تجاوزات ہٹانے کے دوران ہونے والے دھماکے میں کم از کم 26 افراد ہلاک اور 50 سے زیادہ زخمی ہوئے ہیں۔

پولیس کے مطابق غیر قانونی تجاوزات کو ہٹائے جانے کا کام ارفع کریم آئی ٹی ٹاور کے قریب سبزی منڈی میں کیا جا رہا تھا جب یہ دھماکہ ہوا۔

صوبائی وزیر صحت سلمان رفیق نے میڈیا سے بات کرتے ہوئے کہا کہ دھماکے میں اب تک 26 افراد ہلاک اور 50 سے زیادہ افراد زخمی ہوئے ہیں۔

سرکاری ٹی وی کے مطابق ہلاک شدگان میں نو پولیس اہلکار بھی شامل ہیں۔
اس سے قبل وفاقی وزیر داخلہ چوہدری نثار علی نے کہا تھا کہ دھماکے کی نوعیت کی تحقیقات کی جا رہی ہیں۔‘
تاہم برطانوی خبر رساں ایجنسی روئٹرز کو ڈی آئی جی پولیس حیدر اشرف نے بتایا کہ یہ خودکش دھماکہ تھا۔

کمشنر لاہور نے بھی کہا کہ یہ خودکش دھماکہ لگتا ہے لیکن اس کی تصدیق محکمہ انسداد دہشت گردی کرے گا۔
جس جگہ یہ دھماکہ ہوا ہے وہ مصروف علاقہ ہے جبکہ حکومت پنجاب کے ترجمان ملک احمد کے مطابق یہ علاقہ ریڈ زون میں آتا ہے جہاں پر وی آئی پی موومنٹ ہوتی ہے۔

دھماکے کے بعد سکیورٹی فورسز نے علاقے کو گھیرے میں لے کر تحقیقات کا آغاز کر دیا ہے۔
کالعدم تنظیم تحریک طالبان پاکستان نے لاہور میں دھماکے کی ذمہ داری قبول کی ہے۔
کالعدم تنظیم تحریک طالبان پاکستان کےترجمان محمد خراسانی نے دعویٰ کیا ہے کہ تنظیم کے خودکش بمبار نے لاہور میں موٹر سائیکل خودکش دھماکہ کیا ہے۔

جس جگہ یہ دھماکہ ہوا ہے یہ کوٹ لکھپت کا علاقہ ہے جس کے بہت بڑے حصے پر غیر قانونی تجاوزات تھیں۔
جس جگہ ماڈل ٹاؤن ختم ہوتا ہے وہاں سے کوٹ لکھپت شروع ہوتی ہے اور جہاں یہ دھماکہ ہوا ہے اس کے سامنے کچہری بھی واقع ہے۔
لاہور ڈیویلپمنٹ اتھارٹی ان غیر قانونی تجاوزات کے خلاف کچھ عرصے سے کارروائی کر رہی تھی اور اسی سلسلے میں اس علاقے میں پولیس کا ایک کیمپ بھی قائم کیا گیا تھا۔

تبصرے

comments

اپنا تبصرہ بھیجیں